روانگەت هەورازێکی کووڕ

 

از کوبانی تا طراحی‌های استاد‌هادی ضیاالدینی

بەم دێڕانەی درزی حزورت هەزم ناکرێت

لە وێستگەی یەکەم دیمەنی ئەزموونتەوە

خۆت بخزێنە ئاخێزگەی دەلاقەکانی دڕدۆنگی

قژ تاڵی… لێو بەتاڵی… چاو سووری … رێ دووررررر

بە هەگبەی زریکەی قاچاخەکانی لەختت

داری روانگەت لە سێدارەی پرسیارێک دا قەوما

قووتی ئەم مانگەش لە خشتەی دێڕێکا فت

قوڕمساختر لە ئادەم لەنجەی ئاگرینی شوکرانەت

بە پێخەفی زریکەی شەوانەی داڵەکانی داخ و قەراخ

روبەرت سپێنەی چاوی شارە و بڕینی پێوار

روانگەت شەوەزەنگی گوناحێکی نەکردە

بێزو بە چیەوە دەکەی تا نەتگاتێ قامیشەڵان

رووت لە کام دەلاقەوە وەدەر دێنی

تا دای نەکردوە شریتی دەمارەکانی شاژن

دەبەنگیت بخەرە ئامێزی مەتەرێزێکمەوە

لە ژێی ژیلاوە روانگەی ئەم زێرابە کازیوە

بە رووتی پیاسەڕۆکان دەتکێشن لە دیوارا

رابوونێکی دی سەردەمی‌هەنارەکانتە

بە کاتی داکەوتنی شپرزە تاوانێکی قەوماگ

قوت بوویتەوە لە دەلاقەی بێ رەنگی دەبەنگی

کە نوختەچینێک بێت لە هیچ درێژتر بڕژێی

واوەتر کە خووت بە تەنیاییەوە ختورە داخات

بە سەر چین و چروکی ئەم هەورازەی

پەڕگرتووی وەڕەزییەکانت دا

زێیەک دەزێتە یەقیینەکانی پەنجەتەوە

کە شکاوە شار و مەودای پرسیارێک واوەتر

بە پەراوێزی روداوتا دریاگە

 

 

 

***

 

سووسەی قومیاگێ لە توێی ئەم دێڕانە دا

 

سەربەستی سەرتایەک بۆ داڕمانی ئاوەدانی

ئاوەدانی سەرەتایەک بۆ داخستنی روناکی

روناکی سەرەتایەک بۆ رۆچوونە ناو هیچ

لە هیچترین چرکەساتەکانی تەنیایی دا

ئاوا بووی بە دەم زەردەی درەنگانی شارەوە

لە زامستانی ئەم کەوانەیە دا

بە خۆت ئاوسی ئاگر

لە کەلاوەکانی رەنجنامەی ئەم ژانەوە

زووخ دەڕژێ بە زاوزێکانی زگماکی جریوە

بە دەنگی سووتمانی دێڕەکانەوە هەڵ مەگەڕێن

تا ساتەوەختی دڕدۆنگی داکەوتنی نوت

سووکە ئاوڕێک لە ژێکانی گیرۆدەیی بدەوە

لە دوگمای هەناسەت دا

بە دوای بارانی روانگەت دوور دەگرێ

لاوانەوەی هەناسەکانی پیاسەت

بە دیار کولانەوەی سەردەمانی داکەوتنی ژوانگەت

ئێستاکەی چرکەساتەکانی توێی ئەم باگراندە

زێدەتر لە واڵایی داڵدەی زێوان

زرێکەی مێژوی دەم کەلی کەلاوەکان داڕێژێ

دڵنیاییتان بە ئێوارانی خۆر ئاوس

بە گومانی کازیوەتان گرژی لە روخسارتان زووخ

سوورتری لە یەکەم شەوی بووکێنی

ئەو زامەی ئێستاش بە شەقامەکانی باڵاتەوە

تاسەی پڕوسکاوتر لە بزیسکەکان

بە ناو شادەماری تەنیایی دا

رۆ دەبات

کە تاقەتت لە پەنجەرەی دێڕەکان دا

فریای قوماگێ نەکەوت

کە ئەو بێت

لە خۆت دا مەراقتر بگەوزێ

کە رووبەری زریکەت

جێگەی ئەو بە خۆتەوە

لاوانەوه مەترێزی توێی گەڕیانت

روخاوە بە روداوی شعرییەت دا

کە شاعیر قەوماگێکە واوەتر …

 

 

 

هاشم عەلی وەیسی

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *